काठमाडौँ । फिफा विश्वकप फुटबलको अन्तिम १६ मा स्पेनसँग पराजित हुँदै प्रतियोगिताबाट बाहिरिएपछि पोर्चुगलका कप्तान क्रिस्टियानो रोनाल्डो भावुक देखिएका छन् । उनले यो आफ्नो अन्तिम विश्वकप रहेको पुष्टि गर्दै आफूले देशका लागि सक्दो प्रयास गरेको बताएका छन् ।
खेलपछि प्रतिक्रिया दिँदै रोनाल्डोले भने- ‘यसरी प्रतियोगिताबाट बाहिरिनुपर्दा अहिले निकै दुःखी छु। तर मैले आफ्नो तर्फबाट सक्दो सबै प्रयास गरेँ।’
उनले टोलीको प्रदर्शनको प्रशंसा गर्दै स्पेनलाई प्रतियोगिताको प्रमुख दाबेदारसमेत बताए । रोनाल्डोले भने- ‘हामीले राम्रो खेल खेल्यौँ । अझ राम्रो गर्न सक्थ्यौँ, तर स्पेन विश्वकै उत्कृष्ट टोलीमध्ये एक हो । उनीहरू फाइनलसम्म पुग्न सक्छन्, वा त्यसको निकै नजिक पुग्नेछन् ।’
४१ वर्षीय रोनाल्डोले यो आफ्नो अन्तिम विश्वकप भएको दोहोर्याउँदै अब केही समय परिवारसँग बिताउने बताए ।
उनले भने- ‘हो, यो मेरो अन्तिम विश्वकप थियो । अब मसँग सोच्ने समय हुनेछ, परिवारसँग बस्नेछु र जीवन अघि बढिरहन्छ ।’ आफ्नो योगदानप्रति सन्तुष्ट रहेको उल्लेख गर्दै उनले भने- ‘म भोलि पनि आजजस्तै मनस्थितिमा उठ्नेछु । मैले आफ्नो तर्फबाट सबैभन्दा राम्रो प्रयास गरेँ ।’
पोर्चुगलका लागि हासिल गरेका सफलताप्रति गर्व व्यक्त गर्दै रोनाल्डोले भने- ‘मैले पोर्चुगललाई तीनवटा उपाधि जिताउन मद्दत गरेँ । मअघि टोलीले एउटा पनि उपाधि जितेको थिएन । त्यसैले म खुसी मात्रै हुन सक्छु ।’ उनले थपे- ‘म सन्तुष्ट मन लिएर बिदा हुँदैछु । कहिले जितिन्छ, कहिले हारिन्छ, फुटबल यस्तै हो ।’
रोनाल्डोले सन् २०१६ मा जितेको युरोपियन च्याम्पियनसिपलाई पनि आफ्नो करिअरको सबैभन्दा ठूलो उपलब्धिमध्ये एक माने । उनले भने- ‘सन् २०१६ मा जितेको युरोपियन उपाधि मेरा लागि विश्वकप जितेजत्तिकै महत्त्वपूर्ण छ । त्यो उपलब्धि सधैँ रहनेछ। अब भोलि नयाँ दिन हुनेछ र जीवन अघि बढ्नेछ ।’
प्रशिक्षकबाट मार्टिनेजको राजीनामा
पोर्चुगलका मुख्य प्रशिक्षक रोबर्टो मार्टिनेजले फिफा विश्वकपको अन्तिम १६ मा स्पेनसँग १-० ले पराजित भएपछि पदबाट राजीनामा दिएका छन् । उनले यो नतिजालाई भने असफलता मान्न अस्वीकार गरेका छन् ।
डलासस्थित एटी एन्ड टी रंगशालामा भएको खेलमा स्पेनका वैकल्पिक खेलाडी मिकेल मेरिनोले ९१औँ मिनेटमा निर्णायक गोल गरेपछि पोर्चुगल प्रतियोगिताबाट बाहिरिएको थियो । यही खेलसँगै ४१ वर्षीय क्रिस्टियानो रोनाल्डोको विश्वकप यात्रा पनि समाप्त भएको छ ।
सन् २०२३ मा पोर्चुगलको जिम्मेवारी सम्हालेका मार्टिनेजको सम्झौता विश्वकपपछि सकिने तय थियो । खेलपछि आयोजित पत्रकार सम्मेलनमा उनले अब राष्ट्रिय टोलीसँगको आफ्नो यात्रा समाप्त भएको बताए ।
उनले भने- ‘हो, राष्ट्रिय टोलीसँग यो मेरो अन्तिम खेल हो । मैले ४५ खेलमा टोलीको नेतृत्व गर्ने अवसर पाए । पोर्चुगलमा मैले धेरै माया र सम्मान पाए । यो अनुभव सधैँ सम्झिरहनेछु । अब एउटा चक्र समाप्त भएको छ र अहिलेको अवस्थामा यही निर्णय उचित हो ।’
मार्टिनेजले यसअघि बेल्जियमको राष्ट्रिय टोलीका साथै एभर्टन, विगन र स्वान्सी क्लबको पनि प्रशिक्षण सम्हालिसकेका छन् ।
विश्वकपमा भिटिन्हा, जोआओ नेभेस, ब्रुनो फर्नान्डेस र क्रिस्टियानो रोनाल्डोजस्ता स्टार खेलाडी रहेको बलियो टोली हुँदाहुँदै पनि अन्तिम १६ बाट बाहिरिनु असफलता नभएको उनको भनाइ छ ।
उनले भने- ‘हामी असफल भएका होइनौँ । हामी प्रतियोगिताको प्रमुख दाबेदारमध्ये एक टोलीसँग पराजित भएका हौँ । खेलाडीहरूले उत्कृष्ट प्रदर्शन गरे । यस्ता ठूला खेलमा जित र हार साना क्षणले तय गर्छ । जित्ने प्रयास नगर्नु नै असफलता हो, तर हामीले अन्तिम मिनेटसम्म जितका लागि संघर्ष गर्यौँ ।’
मार्टिनेजले विश्वकपमा लगातार अन्तिम चरणसम्म पुग्नु कुनै पनि राष्ट्रका लागि सहज नभएको पनि बताए । उनका अनुसार गोलपोस्टमा बल लाग्ने वा साना घटनाले नै विश्वकपको नतिजा निर्धारण गर्ने गर्छ ।
उनले रोनाल्डोलाई पूरा ९० मिनेट मैदानमा राख्ने आफ्नो निर्णयको पनि बचाउ गरे । उनले भने- ‘जब टोलीलाई गोल आवश्यक हुन्छ, त्यतिबेला क्रिस्टियानो रोनाल्डोलाई मैदानबाट निकाल्न मिल्दैन । उनी पूरा ९० मिनेट खेल्न सक्षम छन् । उनको उपस्थितिले विपक्षीमाथि दबाब सिर्जना गर्छ, खाली स्थान बनाउछ र स्थिर बलको अवस्थामासमेत उनी निकै प्रभावकारी हुन्छन् । अतिरिक्त समयमा भने गोन्कालो रामोसलाई प्रयोग गर्ने सोच हुन सक्थ्यो । तर नियमित समयमा टोलीका सर्वाधिक गोलकर्ता खेलाडीलाई मैदानबाट निकाल्ने अवस्था थिएन ।’
