काठमाडौँ । नेपाली कांग्रेसका नेता डा. सुनीलकुमार शर्माको काठमाडौँ मेडिकल कलेज पब्लिक लिमिटेड (केएमसी) को स्वास्थ्य टोलीले नुवाकोटको शिवपुरीमा निःशुल्क स्वास्थ्य शिविर गरेको छ ।
केएमसीको प्राविधिक सहयोगमा रोटरी क्लब अफ बानेश्वरको आयोजनामा नुवाकोटको शिवपुरी गाउँपालिका वडा नम्बर १ शिवालयमा बृहत निःशुल्क स्वास्थ्य शिविर भएको हो ।
श्री शिवालय आधारभूत विद्यालयमा भएको शिविरमा ७ सय ३४ जनाको परीक्षण गरेको केएमसीका प्रबन्धक एवं प्रमुख प्रशासकीय अधिकृत नारायणप्रसाद दाहालले जानकारी दिए ।
शिविरमा ७५ जनाको ल्याब परीक्षण, ५८ जनाको भिडियो एक्सरे, ६९ जनाको ईसीजी गरिएको थियो ।
११ जनाको दाँत झिकिएको थियो भने २२ जनालाई थप उपचारका लागि केएमसीमा रेफर गरिएको छ ।
डा. शर्माले सम्हालेपछि केएमसी र नोबेलले सेवा सुविधा थपेको छ भने सामाजिक उत्तरदायित्व अन्तर्गत देशका विभिन्न भागमा पुगेर निरन्तर निःशुल्क स्वास्थ्य शिविर गर्दै आएको छ ।
