आज देशभरका दोहोरी साँझ बन्द

काठमाडौं । आइतबार पोखरामा यति एयरलाइन्सको विमान दुर्घटना हुँदा लोकदोहोरी गायिका नीरा छन्त्यालको निधन भएको छ ।

छन्त्यालको निधनको शोकमा राष्ट्रिय लोक तथा दोहोरी गीत प्रतिष्ठानले सोमबार देशभरका दोहोरी साँझ बन्द गर्ने निर्णय गरेको हो । प्रतिष्ठानले आइतबार एक विज्ञप्ति जारी गर्दै सोमबार सबै कार्यक्रम रद्द गर्नेदेखि देशैभरका दोहोरी साँझ समेत बन्द गर्ने निर्णय गरेको हो ।

छन्त्याल माघे संक्रान्ति पर्वको अवसरमा पोखरामा आयोजना हुने कार्यक्रमका लागि काठमाडौंबाट यति एयरलाइन्सको विमान मार्फत पोखरा प्रस्थान गरेकी थिइन् । २२ वर्षीया गायिका छन्त्यालको निधनले प्रतिष्ठानलाई अपूरणीय क्षति पुगेको समेत जारी विज्ञप्तिमा उल्लेख गरिएको छ ।

प्रतिष्ठानले सोमबार छन्त्यालको निधनमा केन्द्र, प्रदेश र सबै शाखामा शोक मनाउने समेत निर्णय गरेको छ ।