काठमाडौं । अमेरिकाको वाणिज्य मन्त्रालयले दक्षिणपूर्वी एसियाका चार देशबाट आयात हुने सोलार प्यानलमा उच्च दरको अतिरिक्त भन्सार महसुल (ट्यारिफ) लगाउने घोषणा गरेको छ।
मन्त्रालयले कम्बोडिया, थाइल्यान्ड, मलेसिया र भियतनामबाट आयात हुने सोलार प्यानलमा ट्यारिफ लगाउने निर्णय लिएको हो, जसअनुसार सबैभन्दा बढी कम्बोडियाबाट आउने प्यानलमा ३,५२१ प्रतिशतसम्म महसुल लाग्नेछ।एक वर्षअघि अमेरिका भित्रका ठूला सौर्य उपकरण उत्पादक कम्पनीहरूले घरेलु उद्योग जोगाउन माग गरेपछि वाणिज्य मन्त्रालयले अनुसन्धान अघि बढाएको थियो।
अनुसन्धानको निष्कर्षमा चीनले सस्तोमा सोलार प्यानल निर्माण गर्न ती देशहरूलाई सहुलियत दिएको र तिनले अमेरिकी बजारमा अनैतिक मूल्यमा सोलार प्यानल बेचेको निष्कर्ष निकालिएको छ।कम्बोडियाबाट आयात हुने प्यानलमा सबैभन्दा बढी ३,५२१ प्रतिशत ट्यारिफ लगाइएको हो, जुन त्यहाँका कम्पनीहरूले अनुसन्धानमा पर्याप्त सहयोग नगरेको कारण देखाइएको छ।
मलेसियामा चिनियाँ कम्पनी जिन्को सोलारद्वारा उत्पादित प्यानलमा भने सबैभन्दा कम ४१ प्रतिशत महसुल तोकिएको छ।थाइल्यान्डमा रहेको ट्रिना सोलारका उत्पादनमा भने ३७५ प्रतिशतसम्म ट्यारिफ लाग्नेछ।भियतनामबाट आयात हुने सोलार प्यानल पनि उच्च ट्यारिफको दायरामा पर्नेछन्, यद्यपि दर उल्लेख गरिएको छैन।अमेरिकी अन्तर्राष्ट्रिय व्यापार आयोग (ITC) ले आगामी जुन महिनामा प्रस्तावित ट्यारिफको अन्तिम निर्णय सुनाउने छ।
