भरतपुरको चितवनमा निर्माणाधीन गौतमबुद्ध अन्तरराष्ट्रिय क्रिकेट रंगशालाको काममा ढिलाइ भएपछि संघीय र प्रदेश सरकारले विनियोजन गरेको १० करोडभन्दा बढी रकम फिर्ता भएको छ।
भरतपुर महानगरपालिकाको समन्वयमा निकासा भएको बजेट निर्माण कम्पनीको लापरबाहीका कारण खर्च हुन नसक्दा फिर्ता गरिएको हो। संघीय सरकारले छुट्याएको २५ करोडमध्ये करिब ७ करोड ३४ लाख र प्रदेश सरकारले छुट्याएको १० करोडमध्ये ३ करोड २० लाख फिर्ता भएको डिभिजनल इञ्जिनियर सन्तोष आचार्यले बताए।
हिमालयन–कालिञ्चोक–बिबिआर जेभीसँग ७८ करोड ५० लाखमा निर्माण सम्झौता भए पनि आर्थिक प्रगति २.४९ प्रतिशत मात्र पुगेको छ। जसका कारण रकम फिर्ता भएकोछ ।
हालसम्म ५ हजार दर्शक क्षमताको प्याराफिटको ढलान, टावरको भुइँतला निर्माण, कम्पाउन्ड, नाली र ट्रान्सफर्मर जडान जस्ता काम मात्र सम्पन्न भएका छन्।
महानगर प्रमुख रेनु दाहालले समयमै काम सम्पन्न गर्न निर्माण कम्पनीलाई दबाब दिएकी छिन्। तर यसरी बजेट फिर्ता हुँदा रङ्गशाला निर्माण झन् अन्योल देखीएको छ ।
