अर्जेन्टिनी फुटबल महानायक लिओनल मेस्सी सन् २०११ पछि पहिलो पटक भारत भ्रमणमा आउन लागेका छन्। ‘GOAT Tour of India 2025’ अन्तर्गत उनको भ्रमण डिसेम्बर १२ मा कोलकाताबाट सुरु हुनेछ।
मेस्सीको यस ऐतिहासिक भ्रमणमा उनी कोलकाता, अहमदाबाद, मुम्बई र नयाँ दिल्ली पुग्ने कार्यक्रम छ। भ्रमणको क्रममा उनले फुटबलप्रति बालबालिकाको रुचि बढाउने उद्देश्यले फुटबल मास्टरक्लास दिने योजना बनाएका छन्।
कोलकाता अवतरणको दिन अर्थात् डिसेम्बर १२ को राति मेस्सी त्यहाँ पुग्ने छन् र दुई दिन बस्नेछन्। त्यहाँ उनलाई सम्मानस्वरूप प्रतिमा अनावरण, विशाल भित्तेचित्रको लोकार्पण, GOAT Concert, र GOAT Cup नामक सात–साइडेड फुटबल प्रतियोगिता आयोजना गरिनेछ।
कोलकातापछि मेस्सी अहमदाबाद पुग्नेछन्, जहाँ अडानी फाउन्डेसनको कार्यक्रममा सहभागी हुनेछन्। त्यसपछि मुम्बईमा डिसेम्बर १४ मा वानखेडे स्टेडियममा पुनः GOAT Concert र GOAT Cup आयोजना हुनेछ। त्यहाँ उनले बलिउड तथा खेल क्षेत्रका प्रतिष्ठित व्यक्तिहरूसँग प्याडल टेनिस समेत खेल्ने कार्यक्रम छ।
भ्रमणको अन्तिम दिन डिसेम्बर १५ मा मेस्सी नयाँ दिल्ली पुग्नेछन्, जहाँ उनले प्रधानमन्त्री नरेन्द्र मोदीसँग शिष्टाचार भेट गर्ने कार्यक्रम तय भएको छ।
यस भ्रमणलाई भारतमा फुटबलको प्रचार–प्रसारका हिसाबले महत्वपूर्ण अवसरको रूपमा हेरिएको छ।
