काठमाडाैं । बंगलादेशविरुद्धको मैत्रिपूर्ण खेलमा नेपालका अञ्जन विष्टले ह्याट्रिक गरेका छन् ।
मंगलबार त्रिपुरेश्वरस्थित दशरथ रंगशालामा चलिरहेको खेलको पहिलो हाफमा अञ्जनले तीन गोल गरेका हुन् ।
अञ्जनले खेलको १८औं मिनेटमा पहिलो गोल गर्दै खाता खोलेका थिए । उनले दोस्रो गोल २७औं मिनेटमा गरे । यस्तै खेलको ३८औं मिनेटमा विशाल राईको फ्रि किकमा हेडर गोल गर्दै अञ्जनले ह्याट्रिक पूरा गरे ।
काठमाडाैं । महिला साफ च्याम्पियनसिप फुटबलको फाइनल खेलमा बंगलादेशले अग्रता लिएको छ ।
दशरथ रंगशालामा जारी खेलमा नेपालले १३ औं मिनेटमा गोल खाएको हो । शुष्मा नायरले गोल गर्दै बंगलादेशलाई अग्रता दिलाएकी हुन् ।
नेपालले पहिलोपटक फाइनलमा बंगलादेशसँग खेलिरहेको हो । यसअघिका पाँच साफ मध्य चारको फाइनलमा नेपालले भारतसँग खेलेको थियो ।
काठमाडाैं । याे साताकाे इंग्लिस प्रिमियर लिग र इंग्लिस फुटबल लिगका खेलहरु स्थगित गरिएको छ । महारानी एलिजाबेथ द्वितीयको निधन भएपछि उनको सम्मानमा लिग स्थगित गरिएको हो ।
शनिबार, आइतबार र सोमबारका लागि तय भएका प्रिमियर लिगका १० खेल स्थगित भएका छन् ।
शुक्रबार गल्फको पिजिए च्याम्पियनसिपको खेल रद्द गरिएको थियो भने इंग्ल्यान्ड र दक्षिण अफ्रिकाबीचको टेस्ट क्रिकेटको खेल पनि स्थगित गरिएको थियो ।
बेलायतमा सबैभन्दा लामो समय शासन गर्ने महारानी एलिजाबेथ द्वितीयको ७० वर्ष शासन गरेपछि बिहीबार ९६ वर्षको उमेरमा निधन भएको थियो ।
काठमाडाैं । नेपाली राष्ट्रिय फुटबल टिमका कप्तान एवं गोलकिपर किरणकुमार लिम्बू आज विवाह बन्धनमा बाँधिने भएका छन् ।
उनले प्रेमिका कञ्चन निरौलासँग विवाह गर्न लागेका हुन् । उनीहरूको विवाह आज आफन्त र सिमित साथीभाइबीच हुन लागेको हो ।
यसअघि उनीहरूले सोमबार मेहेन्दी कार्यक्रम गरेका थिए । गत असार २१ गते किरणले कञ्चनलाई माल्दिभ्समा विवाह प्रस्ताव राखेका थिए ।
माल्दिभ्सको शीर्ष डिभिजनको फुटबल लिगलाई अविस्मरणीय बनाउने क्रममा किरणले लिगकै सर्वोत्कृष्ट गोलिकपर घोषित भए लगत्तै कञ्चनलाई विवाह प्रस्ताव राखेका थिए ।
उनी आवद्ध क्लब माजियाका खेलाडीले लिगको ट्रफी उचालेर खुसी मनाइरहँदा उनले आफ्नी प्रेमिकालाई हातमा समातेर मैदानमै लगेका थिए । त्यसपछि किरणले मैदानमै प्रेमिका कञ्चनलाई सबै सहकर्मीका अघि औँठी लगाइदिएर विवाह प्रस्ताव राखेका थिए ।
कञ्चन पेशाले एयरहोस्टेस हुन् । केही वर्षदेखि प्रेममा रहेका उनीहरूको आज विवाह हुन लागेकाे हाे ।
काठमाडौं । स्टार खेलाडी रोबर्ट लेवान्डोस्कीको दुई गोल प्रेरित बार्सिलोनाले आइतबार राति स्पेनिस ला लिगा फुटबलमा रियल सोसिडाडलाई ४-१ अन्तरले पराजित गरेको छ ।
पहिलो जित निकाल्ने क्रममा लेवान्डोस्कीले दुई गोल गरे भने अन्सु फाती र औसमाने डेम्बेलेले एक एक गोल गरे । सोसिडाडका एलेक्सजेण्डर इसाकले एक गोल फर्काए ।
बार्सिलोनाले पहिलो मिनेटमै गोल गरेपनी पहिलो हाफ १-१ बराबरीमा सकिएको थियो । दोस्रो हाफमा आक्रमक खेल खेल्न सफल बार्सिलोनाले तीन गोल थप्यो ।
पहिलो खेलमा रायो भालेकानोसँग रोकिएको क्याटलान क्लबको यो पहिलो तीन अंक हो ।
जितसँगै बार्सिलोनाले २ खेलमा ४ अंक जोडेर पाँचौं स्थानमा छ । सोसिडाड २ खेलमा ३ अंक जोडेर दशौँ स्थानमा छ ।
काठमाडौं । युवा स्टार खेलाडी केलियन एम्बाप्पेको ह्याट्रिक प्रेरित पेरिस सेन्ट जर्मेन (पीएसजी) ले फ्रेन्च लिग वानमा फराकिलो जित निकालेको छ ।
आइतबार राति पिएसजीले लिललाई ७-१ अन्तरले पराजित गर् । सहज जित निकाल्ने क्रममा एमबाप्पेले ह्याट्रिक गरे भने नेयमारले दुई गोल गरे ।
यस्तै, लियोनल मेस्सी र आचराफ हाकिमीले एक एक थपे । लिलका जोनाथन बाम्बाले एक गोल फर्काए । पिएसजीले पहिलो मिनेटमै गोल गरेको थियो । एम्बाप्पेले एक मिनेट हुन नपाउँदै सुरुवाती अग्रता दिलाएका थिए । पिएसजीले पहिलो हाफमा चार गोल गरेको थियो ।
लगातार तेस्रो जितसंगै पिएसजीले ३ खेलबाट ९ अंक जोडेर शीर्ष स्थानमा छ । लिल ४ अंक जोडेर १२ औं स्थानमा छ ।
न्युयोर्क । ट्वीटर किन्ने असफल प्रयासपछि टेस्लाका प्रमुख कार्यकारी अधिकृत (सीईओ) एलन मस्कले इंग्लिस फुटबल क्लब म्यानचेस्टर युनाइटेड किन्ने घोषणा गरेका छन् ।
‘स्पष्ट हुनको लागि, म रिपब्लिकन पार्टीको आधा र डेमोक्रेटिक पार्टीको आधालाई समर्थन गर्दछु’ उनले ट्वीट गरे । र यो ट्विट लगत्तै उनले भने, ‘साथै, म म्यानचेस्टर युनाइटेडलाई स्वागत गर्दछु ।’
ट्वीट गर्ने क्रममा एलन मस्क कत्तिको गम्भीर छन् भन्ने कसैले पनि बुझ्न सक्दैन । तर, उनको भनाइले म्यान्चेस्टर युनाइटेडलाई उत्साहित बनाएको छ ।
म्यानचेस्टर युनाइटेडका फ्यानहरूले हालैका वर्षहरूमा क्लबको खराब प्रदर्शनका कारण वर्तमान अमेरिकी मालिक ग्लेजर परिवारलाई छोड्न आह्वान गरिरहेका छन् ।
मस्कको ट्विटले ठूलो प्रतिक्रिया बटुलेको छ । एकजना ट्विटर प्रयोगकर्ताले सोधे, ‘के तपाई साँच्चै सोच्नुहुन्छ कि उनले म्यानचेस्टर युनाइटेड किन्दै छन् ? वा काम नगलाग्ने कुरा गरिरहेका छन् ।’
काठमाडौं । स्टार खेलाडी नेयमार र केलियन एम्बाप्पेको गोलमा पेरिस सेन्ट जर्मेन (पिएसजी)ले फ्रेन्च लिग वानमा लगातार दोस्रो जित निकालेको छ ।
शनिबार राति घरेलु मैदानमा पिएसजीले मोन्टपिलोयरलाई ५-२ अन्तरले पराजित गर्यो । पिएसजीको जितमा नेयमारले दुई तथा एम्बाप्पेले सहित रिनाटो सान्चेजले एक एक गोल गर्दा फालाए साक्नोले आत्माघाती गोल गरे ।
यस्तै, भ्रमणकारी टोलीका लागि वाहबी खाज्री र यन्जोले सान्त्वना गोल गरे । पिएसजीको जितमा लियोनल मेस्सी भने गोल बिहिन रहे ।
जितसँगै दुई खेलबाट ६ अंक बनाएको पिएसजी शीर्ष स्थानमा छ । दोस्रो स्थानको लिलको ४ अंक छ । यस्तै पराजित मोन्ट ४ अंक सहित आठौं स्थानमा छ ।
काठमाडौं । फ्रेन्च क्लब पेरिस सेन्ट जर्मेन (पीएसजी) का फरवार्ड लिओनल मेसी र नेयमार बालोन डी ओर अवार्डको मनोनयनमा पर्न असफल भएका छन् ।
आयोजक फ्रान्स फुटबलले सार्वजनिक गरेको मनोनयनमा पर्ने ३० जनाको सूचीमा कीर्तिमानी ७ पटकको विजेता मेसी र नेयमार अटाएका छैनन् ।
उनी २००६ पछि पहिलो पटक मनोनयनमा नपरेका हुन् । मेसीले पछिल्लो पटक २०२१ मा अवार्ड जितेका थिए । यस अवार्डको मुख्य दाबेदार मानिएको करिम बेन्जिमा सहित स्पेनिस क्लब रियल मड्रियका ६ खेलाडी मनोनयनमा छन् ।
अवार्ड घोषणा आगामी अक्टोबर १७ हुने आयोजकले जनाएको छ ।
मनोनयनमा पर्ने खेलाडीको सूची –
करिम बेन्जिमा (रियल मड्रिड), थिवाउट कोर्टुवा (रियल मड्रिड), भिनिसियस जुनियर (रियल मड्रिड ), क्यासमिरो (रियल मड्रिड ), लुका मोड्रिच (रियल मड्रिड), एन्टेनियो रुडिगर (चेल्सी/रियल मड्रिड ), मोहम्मद सलाह (लिभरपुल), ट्रेन्ट एलेक्सान्डार आर्नोल्ड (लिभरपुल), लुयस डियाज (लिभरपुल), फाविन्हो (लिभरपुल), डार्विन नुनेज (लिभरपुल), भर्जिल भान डाइक (लिभरपुल), रियाद महारेज (म्यानचेस्टर सिटी), बर्नाडो सिल्भा (म्यानचेस्टर सिटी), फिल फोडेन (म्यानचेस्टर सिटी), केभिन डि ब्रुयन (म्यानचेस्टर सिटी), क्यान्सेलो (म्यानचेस्टर सिटी), एर्लिङ हालान्ड (म्यानचेस्टर सिटी/डर्टमुन्ड), रोबर्ट लेवान्डोस्की (बार्सिलोना/बायर्न म्युनिख), ह्युङ मिन सन (टोटेनहम), ह्यारी केन (टोटेनहम), योसुवा किम्मिख (बायर्न म्युनिख), साडियो माने (बायर्न म्युनिख/लिभरपुल), राफयल लियो (एसी मिलान), मेक मेइगनान (एसी मिलान), क्रिस्टोफोर एनकुकु (लाइप्जिग), क्रिस्टियानो रोनाल्डो (म्यानचेस्टर युनाइटेड), केलियन एमबाप्पे (पिएसजी), हालेर (डर्टमुन्ड) र डुसान भ्लाहोभिक (युभेन्ट्स)
काठमाडौं । आगामी दुई मैत्रीपूर्ण खेलका लागि मुख्य प्रशिक्षक अब्दुल्लाह अल्मुताईरीले २६ खेलाडीलाई प्रारम्भिक प्रशिक्षणमा बोलाउन माग गरेका छन् ।
आगामी दुई अभ्यास खेलका लागि अब्दुल्लाहले यसअघि एसियन कप छनोट खेलेका २३ खेलाडीमा तीन खेलाडी थप गर्दै २६ खेलाडी नाम अखिल नेपाल फुटबल संघ (एन्फा) सचिवालयलाई बुझाएका हुन् ।
जसमा यसअघि निलम्बनमा परेका मिडफिल्डरद्वय अन्जन विष्ट र तेज तामाङ छन् । यस्तै, ‘रिकवरी’ भएका त्रिभुवन आर्मी फुटबल क्लबका दिनेश हेम्जन छन् । दिनेश गत ‘ए’ डिभिजन लिग २०७८ को उदयीमान खेलाडीसमेत हुन् ।
नेपालले आगामी महिना बंगलादेशसँग घरेलु मैदानमा दुई मैत्रीपूर्ण खेल खेल्ने तयारी गरेको छ । यद्यपि, आधिकारिक निर्णय भएको छैन ।
कुवेती नागरिक अब्दुल्लाहले दुई मैत्रीपूर्णको लागि २६ खेलाडीको नाम बुझाउँदा टिम व्यवस्थापक भने चाँडै नियुक्त गर्न एन्फालाई आग्रह गरेका छन् । यसअघि व्यवस्थापक मधुसुदन उपाध्याय थिए । एन्फा कार्यसमिति चेन्ज भएसँगै हाल उनी एन्फा बाहिर छन् । यस्तै, प्रशिक्षक अब्दुल्लाहले टिम व्यवस्थापकबाहेक सम्पूर्ण टेक्निकल टिम कुवेत पुगेकै माग गरेका छन् ।
गत १४ वैशाखमा प्रशिक्षक अब्दुल्लाह व्यवहारको कारण अन्जन, तेजसहित राष्ट्रिय टोलीका १० खेलाडीले बन्द प्रशिक्षण होटल छोडेका बताएका थिए । त्यसपछि क्याम्प छोडेका तेज र अन्जनसहित सुजल श्रेष्ठ, अनन्त तामाङ, विशाल राई, विशाल श्रेष्ठ, विमल घर्ती मगर, दिनेश राजवंशी, रोहित चन्द, सुमन लामासहित कप्तान किरणकुमार लिम्बूलाई बाहिर राख्दै प्रशिक्षक अब्दुल्लाहले २३ सदस्यीय टिमलाई कुवेत सिटी पुर्याएका थिए ।
यसपछि खेलाडी र प्रशिक्षकबीच विवाद उग्र बनेको छ । प्रशिक्षक केही खेलाडी ‘ब्याक’ गर्न चाहँदैनन् । जुन ‘काण्ड’ असार ६ गते सम्पन्न भएको एन्फाको चुनावी साधारणसभामा समेत देखिएको थियो ।
चुनाव जितेलगत्तै वर्तमान अध्यक्ष पंकजविक्रम नेम्बाङलाई कारबाहीमा परेका केही खेलाडी बधाई दिन बुढानिलकण्ठस्थित पार्क भिलेज पुगेका थिए । निर्वाचित अध्यक्ष नेम्बाङ र वरिष्ठ उपाध्यक्ष वीरबहादुर खड्काले एन्फाको पहिलो निर्णय खेलाडी बोलाउने बताएका थिए । यसपछि ८ असारमा बसेको एन्फाको अवैधानिक पहिलो बैठकले १० खेलाडीलाई राष्ट्रिय टिममा फिर्ता बोलाउने निर्णय गरेको थियो ।