चुनावमा अपवित्र गठजाेड भयाे, राजनीति जित्याैँ : शेखर काेइराला

काठमाडाैं । नेपाली काँग्रेसको सभापति पदमा पराजित नेता शेखर कोइरालाले १४ औं महाधिवेशनमा पार्टीमा अपवित्र गठजोड भएको बताएका छन् । शुक्रबार एक विज्ञप्ति जारी गरी उनले चुनावमा पराजित भएपनि राजनीति भने जितेको बताएका छन् ।

विज्ञप्तिमा उनले भनेका छन् ‘हामीसँग उर्जावान् युवाहरुको समूह थियो । पार्टीमा यथास्थिति चाहने सबैको अपवित्र गठजोड पनि हामी विरुद्ध भयो, तर पनि हामी लड्यौँ र राजनीति जित्यौँ ।’

उनले आफूले ४० प्रतिशत मत प्राप्त गर्दा भावविभाेर भएकाे पनि बताएका छन् । उनले बताएका छन् ​‘मलाई प्रतिनिधि साथीहरूबाट प्राप्त ४० प्रतिशत मतले म भावविभोर भएको छु । प्रतिनिधि साथीहरुले म प्रति देखाएको विश्वास र भरोसा प्रति म अविचलित रहने प्रण गर्दछु ।’

आफू पार्टी सभापतिमा पराजित भए पनि लोकतन्त्रवादीहरुको मन जित्न सफल भएकोसमेत कोइरालाले बताएका छन् । ‘पार्टीभित्र मात्र होइन, पार्टी बाहिरका आम लोकतन्त्रवादीहरु बीच पनि हामीले काँग्रेसप्रति आकर्षण बढाएका छौँ, भरोसा र विश्वासको वृद्धि गराएका छौंँ’ विज्ञप्तिमा भनिएको छ ।

© 2024 All right reserved Site By : Himal Creation || सञ्चार रजिस्ट्रार दर्ता नं : ०००९७