काठमाडाैं । नेकपा एकीकृत समाजवादीका अध्यक्ष माधवकुमार नेपालले आफ्नो पार्टीको लक्ष्य र उदेश्य जनतामात्र भएको बताएका छन् ।
शुक्रबार नेकपा (एकीकृत समाजवादी) र साध्यबहादुर भण्डारी नेतृत्वको राष्ट्रिय जागरण परिषद नेपालबीच पार्टी एकता घोषणा कार्यक्रममा अध्यक्ष नेपालले आफ्नो उदेश्य चूनाव नभएर जनता र जनताको समस्या भएको बताएका हुन् । उनले जनताको समस्या समाधानका लागि आफ्नो पार्टी अग्रपङ्तीमा उभिने जिकिर गरे ।
उनले छलफल र परामर्शका आधारमा पार्टीले सहि निर्णय गर्ने बताए । अध्यक्ष नेपालले अहिले एकीकृत समाजवादी पार्टी प्रति आकर्षण बढेको भन्दै यसले थप उत्साहित बनाएको पनि जानकारी गराए ।
कार्यक्रममा राष्ट्रिय जागरण परिषद भण्डारीले आफू सदैव राष्ट्रिय हितको पक्षमा लाग्ने व्यक्ति भएकाले एकीकृत समाजवादीमा आएको बताए । उनले एमसीसीको चालवाजीलाई अब नेपाली जनताले बुझ्नुपर्ने धारणा राखे ।
भण्डारी केही वर्षअघि राष्ट्रिय जनमोर्चामा र एमालेमा पनि थिए । तर, एमालेले एमसीसीको पक्ष लिएकोमा असन्तुष्ट भण्डारीले गत वर्ष जागरण परिषद् गठन गरेका थिए ।
