काठमाडौं । शनिबार प्युठानमा भएको जीप दुर्घटनामा परी मृत्यु भएका परिवारलाई स्थानीय सरकारले नगद राहत दिने निर्णय गर्नुका साथै शोकमा एक दिन बिदा दिएको छ ।
गौमुखी गाउँपालिकाले राहत र बिदाको निर्णय गरेको हो । दुर्घटनामा सो गाउँपालिकाका सातसहित आठ जनाको ज्यान गएको थियो ।
नौबहिनी गाउँपालिकाबाट बेहुली लिएर फर्कँदै गरेको जीप लिवाङको ओखरपाटा नजिकै दुर्घटना हुँदा गौमुखी गाउँपालिकाका सात जना र नौबहिनी गाउँपालिकाका एक जनाको ज्यान गएको थियो ।
दुर्घटनाले सिंगो गाउँपालिका शोकमा डुबेकोले आइतबार बिदा दिइएको अध्यक्ष विष्णुकुमार गिरीले जानकारी दिए । गाउँपालिकाले मृतकका परिवारलाई ५० हजार रुपैयाँ राहत उपलब्ध गराउने पनि जनाएकाे छ ।
