ट्वीटरले ‘ब्लू-टिक’का लागि लिन थाल्यो ८ डलर मासिक शुल्क

काठमाडाैं । ट्वीटरले प्रयोगकर्ताहरूलाई ‘ब्लू-टिक’ प्रमाणीकरणका लागि ७.९९ डलर मासिक शुल्क लिन सुरु गरेको छ । कम्पनीलाई संसारकै धनी व्यक्ति इलोन मस्कले अधिग्रहण गरेपछि महत्त्वपूर्ण परिवर्तनको रुपमा यो सेवा सुरु भएको हो ।

शनिवार ट्वीटरले एप्पल आईओएसको अपडेटमा प्रिमियम ‘ट्वीटर ब्लू’ सेवामा ‘साइन अप’ गर्ने कुनै पनि प्रयोगकर्ताहरूले ‘ब्लू-टिक’ पाउने बताएको छ ।

हाल बेलायत, अमेरिका, क्यानडा, अष्ट्रेलिया र न्यूजिल्याण्डमा उपलब्ध यो अपडेटमा भनिएको छ : यो सेवामार्फत ‘तपाईंहरुले सेलिब्रेटीहरू, कम्पनीहरू र राजनीतिज्ञहरूले जस्तै ब्लू-टिक प्राप्त गर्नुहुनेछ।’

मस्कले प्लेटफर्मको ४४ बिलियन डलर टेकओभर पूरा गरेपछि ट्वीटरको आम्दानी स्रोतहरूमा विविधीकरण ल्याउने र कम्पनीको लागत घटाउने लक्ष्य राखेका छन् ।

कम्पनीले शुक्रबारदेखि व्यापक रुपमा विश्वभरका कर्मचारी कटौती समेत सुरु गरिसकेको छ । कम्पनीका विश्वभर रहेका ७ हजार ७ सयभन्दा बढी कर्मचारीमध्ये आधा हटाउने बताइएकाे छ ।

© 2022 All right reserved Site By : Himal Creation || सञ्चार रजिस्ट्रार दर्ता नं : ०००९७