काठमाडौं । उपत्यकासहित देशभर चिसाे बढ्दै गएको छ । शनिबार काठमाडौं उपत्यकाको न्यूनतम तापक्रम यस वर्षकै सबैभन्दा कम ६.५ डिग्री मापन गरिएको छ । यस्तै, अधिकतम तापक्रम १९ डिग्रीको अनुमान गरिएको छ ।
मौसमविदका अनुसार अब देशभर चिसो बढ्दै जानेछ । हाल पश्चिम तराई, मध्य तराई र पूर्वी तराईका केही क्षेत्रमा हुस्सु लागेको छ । मध्यान्हपछि क्रमिक रूपमा सुधार जाने महाशाखाले जनाएको छ ।
हाल सबैभन्दा कम तापक्रम जोमसोममा माइनस ४.५, जुम्लामा माइनस ३, र जिरिमा १.५ रहेको छ ।
आज प्रदेश एक, गण्डकी र कर्णालीका केही पहाडी क्षेत्रमा मौसम आंशिक बदली हुने अनुमान छ ।
मौसम पूर्वानुमान महाशाखाका अनुसार प्रदेश एक, गण्डकी र कर्णालीका पहाडी केही क्षेत्रबाहेक अरु ठाउँको मौसम समान्यतया सफा नै छ ।
महाशाखाले चिसोबाट जोगिन आवश्यक तयारी र सावधानी अपनाउन पनि अनुरोध गरेको छ ।
मौसम दुई तरिकाले चिसो हुन्छ । एउटा अधिकतम तापक्रम घटेर र अर्को न्यूनतम तापक्रम घटेर । डम्म बादल लाग्यो भने बादलले ब्ल्यांकेटको काम गर्छ र अधिकतम तापक्रम घट्छ ।
बादल लागेन भने न्यूनतम तापक्रम घट्छ र चिसो हुन्छ । माैसमविदका अनुसार अहिले चिसो भएको न्यूनतम तापक्रम घटेर हो ।
