काठमाडौं । संस्कृति पर्यटन तथा नागरिक उड्डयन मन्त्री सुदन किरातीले भारतको उत्तरप्रदेश ललिताघाट बनारसी साम्राज्यस्वर पशुपतिनाथ महादेवको मन्दिर परिसरको वृद्धाश्रम पुनःनिर्माण गरिने जानकारी दिएका छन् ।
यसअघि राष्ट्रिय सभा बैठकमा विनियोजन विधेयक २०८० माथि मन्त्रालयगत रुपमा भएको छलफलका क्रममा सांसदहरुले भारतमा रहेको पशुपतिनाथ मन्दिर तथा धर्मशाला पुर्ननिर्माणका लागि मन्त्रालयले बजेट छुट्याएको विषयप्रति सरकारको जवाफ मागेका थिए ।
जवाफमा मन्त्री किरातीले साम्राज्यस्वर पशुपतिनाथ मन्दिर र त्यसको परिसरमा रहेको वृद्धाश्रम तथा धर्मशाला पुनःनिर्माण पुरातत्व विभागको समन्वयनमा भारतस्थित नेपाली राजदुतावासले गर्ने स्पष्ट पारे ।
मन्त्री किराँतीले उक्त मन्दिर नेपाल सरकारकै स्वामित्वमा रहेको समेत बताए ।
उनले भने, ‘ललिताघाट बनारसी साम्राज्यस्वर पशुपतिनाथ महादेवको मन्दिर परिसरमा रहेको वृद्धाश्रम तथा धर्मशाला पुर्ननिर्माण गर्न पाँच करोड विनियोजन गरिएको छ । पुनःनिर्माणकार्य पुरातत्व विभागको समन्वयनमा भारतस्थित नेपाली राजदुतावासले नेपालकै सार्वजनिक खरिद ऐन बमोजिम निर्माण गर्ने छ ।’
