काठमाडौं। नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले नेपाल समाजवादी पार्टी (नेसपा)का अध्यक्ष महिन्द्र राय यादव पनि पार्टी एकता प्रक्रियामा अन्ततः जोडिने विश्वास व्यक्त गरेका छन्।
सोमबार गंगानारायण श्रेष्ठ नेतृत्वको नेसपा समूहसँगको एकता घोषणासभालाई सम्बोधन गर्दै प्रचण्डले यादवसँग निरन्तर संवाद भइरहेकाले छिट्टै उनी पनि माओवादी केन्द्रमै फर्किने संकेत गरे।
“महिन्द्र राय यादवजीसँग हिजो र आज पनि छलफल भएको छ। उहाँसँग सल्लाह गरेर नै श्रेष्ठ समूहसँग एकता गरिएको हो,” प्रचण्डले भने, “केही प्राविधिक कारण, जस्तै ‘माओवादी’ नामप्रति असहजता, ले उहाँ तत्काल एकतामा जोडिन सक्नुभएको छैन। तर उहाँ बाहिर बोल्नुभएको छ— ‘भोलि म पनि माओवादी केन्द्रमै जाने हो।’ त्यसैले म विश्वस्त छु, उहाँ पनि एकता प्रक्रियामा आउनुहुन्छ।”
‘एमालेसँगको एकता सैद्धान्तिक रूपमा गलत थिएन’
कार्यक्रममा बोल्दै प्रचण्डले २०७४ सालमा नेकपा (एमाले)सँग गरिएको एकता सैद्धान्तिक दृष्टिले उचित भएको जिकिर गरे। तर केही तत्वहरूले त्यस एकतालाई विभाजनतर्फ धकेलेको आरोप उनले लगाए।
“समाजवादी क्रान्तिलाई मौलिक ढंगले अगाडि बढाउने उद्देश्यले एमालेसँग एकता गरिएको थियो,” उनले स्मरण गरे, “पार्टी र जनताले अनुमोदन गरेका थिए। हामीले दुईतिहाइको जनादेश पाएका थियौं। समाजवादको आधार तय गर्ने ठूलो अवसर थियो।
झण्डै ९५ प्रतिशतले एकतालाई समर्थन गरेका थिए, तर केहीलाई त्यो मन परेन। तिनीहरूले एकता तोड्न अभियान चलाए, जहाँ केही स्वदेशी र विदेशी शक्तिहरू पनि सक्रिय थिए।” प्रचण्डको भनाइमा, एमालेसँगको एकता विफल हुनुमा आन्तरिक असहमति मात्र होइन, बाह्य प्रभाव समेत जिम्मेवार थिए।
