काठमाडौं। राष्ट्रिय स्वतन्त्र पार्टी (रास्वपा)का सांसद शिशिर खनालले ‘भिजिट भिसा’ प्रकरणमा गृहमन्त्री रमेश लेखकले पदमा बसेर निष्पक्ष छानबिन सम्भव नभएको बताएका छन्।
प्रतिनिधि सभाको आजको बैठकमा बोल्दै खनालले सरकारको दोहोरो मापदण्डप्रति आक्रोश व्यक्त गरे। “सहकारी प्रकरणमा रवि लामिछानेलाई तीन महिना हिरासतमा राखियो,” खनालले भने, “तर, सत्तापक्षका सांसदहरूलाई प्रहरी कार्यालयमै चिया खुवाएर घर पठाइन्छ। अब हामी कसरी विश्वास गर्ने कि गृहमन्त्री निष्पक्ष छानबिन गर्छन्?”
रास्वपाका सभापति रवि लामिछाने हाल सहकारी ठगी प्रकरणमा पुर्पक्षका लागि थुनामा छन्। यता गृहमन्त्री लेखक ‘भिजिट भिसा’ प्रकरणमा मुछिएपछि रास्वपाले उनको राजीनामाको माग गर्दै आएको छ।
रास्वपाको असन्तुष्टि गहिरिएको अर्को कारण लेखकको विगतकै भूमिका पनि हो। करिब १४ महिनाअघि प्रमुख प्रतिपक्षका नेताका रूपमा लेखकले त्यसबेला गृहमन्त्री रहेका लामिछानेलाई सहकारी प्रकरणमा राजीनामा माग्दै नैतिकताको पाठ पढाएका थिए। अहिले त्यही नैतिकताको प्रश्न लेखकमाथि फर्किएको छ, र त्यसको राजनीतिक लाभ लिन रास्वपा आक्रामक देखिएको छ।
