वासिङ्टन डीसी । अमेरिकी राष्ट्रपति डोनाल्ड ट्रम्पको नेतृत्वमा लागू गरिएको कडारुप आप्रवासन नीतिअनुसार अफ्रिका र मध्यपूर्वका १२ देशका नागरिकमाथि अमेरिका प्रवेशमा प्रतिबन्ध सोमबारदेखि लागू भएको छ।
यो नीति लागू भइरहँदा अमेरिका भित्र लस एन्जलसजस्ता सहरहरूमा आप्रवासन नीतिविरुद्ध व्यापक विरोध र हिंसा देखिएको छ।प्रतिबन्ध लागेका देशहरूमा अफगानिस्तान, म्यानमार, चाड, कङ्गो गणराज्य, इक्वेटोरियल गिनी, इरिट्रिया, हैटी, इरान, लिबिया, सोमालिया, सुडान र यमन रहेका छन्।
त्यसैगरी बुरुन्डी, क्युबा, लाओस, सियरा लियोन, टोगो, तुर्कमेनिस्तान र भेनेजुएलाका नागरिकहरूमाथि भिसा प्रक्रिया थप कडा बनाइएको छ।
के प्रतिबन्धको दायरामा पर्छ?
यी देशका नागरिकहरूलाई अब पर्यटक, विद्यार्थी, कार्य तथा आप्रवासी भिसा दिइने छैन।
अमेरिका बाहिर रहेकाहरू र भिसा नभएकाहरू प्रतिबन्धको दायरामा पर्छन्।
अमेरिकी भिसा पहिले नै जारी भइसकेका व्यक्तिहरूमा भने प्रतिबन्ध लागू नहुने जनाइएको छ।
यो नीति लागू गर्न अमेरिकी विदेश मन्त्रालयले सबै दूतावास तथा वाणिज्यदूतावासहरूलाई आवश्यक निर्देशनहरू जारी गरिसकेको छ।
आंशिक प्रतिबन्ध पनि लागू
केही देशहरूका नागरिकहरूलाई पूर्ण प्रतिबन्ध नलागे पनि, उनीहरूले केही निश्चित प्रकारका भिसा मात्र प्राप्त गर्न सक्ने व्यवस्था गरिएको छ।
ट्रम्प प्रशासनको यस्तो निर्णयप्रति मानवअधिकारकर्मी, आप्रवासी समुदाय र नागरिक समाजबाट आलोचना भइरहेको छ। आलोचकहरूले यसलाई ‘मुस्लिम ब्यान’ को विस्तारित रूप भन्दै निन्दा गरेका छन्।
