काठमाडौँ । अमेरिकी राष्ट्रपति डोनाल्ड ट्रम्प सहभागी ह्वाइट हाउस संवाददाता संघको रात्रिभोज कार्यक्रममा गोली चलाउने व्यक्ति दक्षिण क्यालिफोर्नियाका शिक्षक तथा भिडियो खेल निर्माता रहेको खुलेको छ ।
गोली चलाउने व्यक्ति ३१ वर्षीय कोल टोमस एलेन भएको सिएनएनले उल्लेख गरेको हो । राष्ट्रपति ट्रम्पसहित उच्च अधिकारीहरू सहभागी भएको कार्यक्रममा उनलाई हतियारसहित नियन्त्रणमा लिइएको छ ।
उनी लस एन्जलस नजिकैको टोरेन्स क्षेत्रमा बसोबास गर्दै आएका थिए । सार्वजनिक अभिलेखअनुसार एलेन परीक्षा तयारी तथा ट्युसन सेवा दिने एक संस्थामा अंशकालीन शिक्षकका रूपमा काम गर्थे । उनलाई सन् २०२४ डिसेम्बरमा कम्पनीले ‘महिनाको उत्कृष्ट शिक्षक’ समेत घोषणा गरेको थियो ।
उनले सन् २०१७ मा क्यालिफोर्निया प्रविधि संस्थानबाट यान्त्रिक इन्जिनियरिङमा स्नातक गरेका थिए । त्यसपछि गत वर्ष क्यालिफोर्निया राज्य विश्वविद्यालय-डोमिङ्गेज हिल्सबाट कम्प्युटर विज्ञानमा स्नातकोत्तर पूरा गरेका थिए । विद्यार्थी जीवनमा उनले ह्विलचेयरका लागि आपत्कालीन ब्रेकको नमुना तयार गरेका थिए, जसका कारण स्थानीय समाचारमा पनि स्थान पाएका थिए ।
एलेनले आफूलाई भिडियो खेल निर्माता पनि बताएका छन् । उनले ‘बोर्डम’ नामक स्वतन्त्र भिडियो खेल सार्वजनिक बिक्रीमा राखेका थिए । साथै ‘फर्स्ट ल’ नामक दोस्रो खेल विकास गरिरहेको जानकारी पनि दिएका थिए ।
उनले किन गोली चलाए भन्ने बारेमा भने खुलासा हुन बाँकी रहेको छ ।
अमेरिकाको ह्वाइट हाउस संवाददाता रात्रिभोज कार्यक्रमका क्रममा गोली चलेको थियो । राष्ट्रपति डोनाल्ड ट्रम्प र उपराष्ट्रपति जेडी भान्ससहित सहभागी वाशिंगटनस्थित होटल हिल्टनमा उपस्थित रहेका बेला बाहिर गोली चलेको हो ।
घटनापछि सुरक्षाकर्मीले ट्रम्प र भान्सलाई तत्काल सुरक्षित स्थानमा लगेका थिए । गोलीबारी रात्रिभोज हलमाथि रहेको लबी क्षेत्रमा भएको थियो ।
सिक्रेट सर्भिसको निर्देशनपछि कार्यक्रममा रहेका अतिथिहरूलाई टेबलमुनि झुक्न भनिएको थियो । भारी हतियारसहितका सुरक्षाकर्मी तुरुन्तै मञ्चमा पुगेर सम्पूर्ण कार्यक्रमस्थललाई सुरक्षित बनाएका थिए ।
