काठमाडौँ । नेपालमा हाइड्रोजनमा आधारित सवारी साधनको सुरक्षित, दिगो तथा प्रभावकारी विकास र सञ्चालनका लागि पूर्वाधार विकास मन्त्रालयले गृहकार्य अगाडि बढाएको छ ।
यससम्बन्धी आवश्यक नीतिगत, कानुनी तथा प्राविधिक आधार तयार गर्ने उद्देश्यले मन्त्रालयले विज्ञ, विशेषज्ञ तथा सरोकारवालाहरूबाट लिखित सुझाव माग गरेको हो । मन्त्रालयले जारी गरेको सूचना अनुसार, हाइड्रोजन प्रविधिको प्रयोगका लागि अन्तर्राष्ट्रिय उत्कृष्ट अभ्यास, नियामक व्यवस्था, सुरक्षा मापदण्ड, निर्देशिका र आवश्यक जनशक्ति विकाससम्बन्धी विषयमा सुझावहरू संकलन गर्न लागिएको हो ।
यस प्रक्रियामा विश्वविद्यालय, अनुसन्धान संस्था, व्यावसायिक निकाय, उद्योग, विकास साझेदार तथा अन्तर्राष्ट्रिय संस्थाहरूलाई सहभागी हुन मन्त्रालयले अनुरोध गरेको छ ।
मन्त्रालयले मुख्यतया ६ वटा क्षेत्रमा केन्द्रित रहेर सुझाव माग गरेको छ । जसमा हाइड्रोजन सवारीसम्बन्धी अन्तर्राष्ट्रिय अनुभव, नीतिगत व्यवस्था, र उत्पादन देखि इन्धन भर्ने पूर्वाधार सम्मका सुरक्षा मापदण्डहरू रहेका छन् । विशेषगरी हाल सञ्चालनमा रहेका इन्टरनल आइसीइ इन्जिन युक्त सवारी साधनलाई हाइड्रोजन प्रविधिमा रूपान्तरण गर्ने सम्भावना, त्यसको लागत र प्राविधिक पक्षका बारेमा समेत सुझाव मागिएको छ ।
इच्छुक सरोकारवालाहरूले आगामी २०८१ साल साउन २० गतेसम्म मन्त्रालयको आधिकारिक इमेल मार्फत आफ्ना सुझावहरू पेस गर्न सक्नेछन् । सुझाव पेस गर्दा सम्बन्धित संस्था वा निकायको संक्षिप्त परिचय, कार्यक्षेत्र र अनुभव समेत अनिवार्य रूपमा खुलाउनुपर्ने सूचनामा उल्लेख छ ।
मन्त्रालयका अनुसार प्राप्त सुझावहरूको आवश्यक अध्ययन र विश्लेषण गरिनेछ । त्यसकै आधारमा नेपालमा हाइड्रोजनमा आधारित सवारी साधनसम्बन्धी ठोस नीति, कानुनी व्यवस्था र कार्यविधि तर्जुमा गरिने सरकारको योजना रहेको छ । यस कदमले नेपालको यातायात क्षेत्रलाई वातावरणमैत्री र प्रविधिमैत्री बनाउन महत्त्वपूर्ण भूमिका खेल्ने विश्वास गरिएको छ ।
