साताको पहिलो कारोबार दिन नेपाली सेयर बजारमा गिरावट देखिएको छ। सोमबार नेपाल स्टक एक्सचेञ्ज (नेप्से) परिसूचक २०.२७ अंकले घटेर २७३५.१४ बिन्दुमा बन्द भएको हो।
यससँगै बजार लगातार तेस्रो कारोबार दिन ओरालो लागेको छ।
बजारमा अधिकांश कम्पनीको सेयर मूल्य घट्दा लगानीकर्ताको मनोबल केही कमजोर देखिएको छ। कारोबार भएका कम्पनीमध्ये ४३ वटाको सेयर मूल्य बढेको भने २११ भन्दा बढी कम्पनीको मूल्य घटेको छ। ६ कम्पनीको सेयर मूल्यमा कुनै परिवर्तन आएन।
यस दिन कुल ९२ लाख ३६ हजार ६७७ कित्ता सेयर ५६ हजार ८४५ पटक खरिद/बिक्री हुँदा ४ अर्ब ८ करोड ४८ लाख रुपैयाँभन्दा बढीको कारोबार भएको नेप्सेले जनाएको छ।
समूहगत सूचकतर्फ फाइनान्स क्षेत्रबाहेक अधिकांश उपसूचक नकारात्मक रहे। व्यापार तथा अन्य समूहमा सबैभन्दा बढी दबाब देखिएको छ भने विकास बैंक समूह पनि एक प्रतिशतभन्दा बढीले घटेको छ।
बजार समग्र रूपमा घटे पनि केही कम्पनीका लगानीकर्ताले उल्लेखनीय प्रतिफल प्राप्त गरेका छन्। कालिञ्चोक हाइड्रोपावरको सेयर मूल्य १४.९९ प्रतिशतले बढ्दा क्रेस्ट माइक्रो लाइफ इन्स्योरेन्स १३.११ प्रतिशतले उकालो लागेको छ। सोपान फर्मास्युटिकल्स, सामुदायिक लघुवित्त तथा सिभिल बैंकका सेयर पनि बढी लाभ कमाउने कम्पनीको सूचीमा परेका छन्।
कारोबार रकमका आधारमा सेन्ट्रल फाइनान्स अग्रस्थानमा रह्यो। उक्त कम्पनीको २० करोड ४६ लाख रुपैयाँभन्दा बढीको सेयर कारोबार भएको छ।
अघिल्लो कारोबार दिनको तुलनामा कारोबार रकम र सेयर किनबेच दुवै घटेका छन्। गत शुक्रबार ५ अर्ब ६२ करोड रुपैयाँभन्दा बढीको कारोबार भएको थियो।
