काठमाडाैं । शहरी विकास मन्त्री रामकुमारी झाँक्रीले राजीनामा दिएकी छन् । राजीनामाबारे जानकारी दिन ५ बजे मन्त्रालयमा पत्रकार सम्मेलन आयाेजना गरिएकाे उनकाे सचिवालयले जनाएकाे छ ।
नेकपा एकीकृत समाजवादीबाट मन्त्री बनेकी झाँक्री अघि पर्यटनमन्त्री प्रेम आलेले राजीनामा दिइसकेका छन् ।
यसअघि असार १० गते मन्त्री फेरबदलमा असन्तुष्टि जनाएर चार मन्त्रीसहित नेकपा एसका १० सांसदले संसदीय दलको बैठक माग गर्दै अध्यक्ष नेपालसमक्ष लिखित निवेदन दिएका थिए ।
त्यसमध्ये आलेसहित ६ सांसदले हस्ताक्षर फिर्ता लिएका थिए । सांसदहरू पर्यटनमन्त्री प्रेम आले, कृष्णलाल महर्जन, गोपालबहादुर बम, वीनादेवी बुढाथोकी, पुष्पाकुमारी कर्ण कायस्थ, धनबहादुर बुढाले पनि हस्ताक्षर फिर्ता गरेका थिए ।
यस्तै, स्वास्थ्यमन्त्री विरोध खतिवडा, शहरी विकासमन्त्री रामकुमारी झाँक्री र श्रम रोजगार तथा सामाजिक सुरक्षामन्त्री कृष्णकुमार श्रेष्ठले भने यसबारे केही बताएका थिएनन् ।
नेकपा (एस)ले जेठ २२ गते मन्त्रीहरूलाई फिर्ता बोलाउने निर्णय गरेको थियो ।
