काठमाडाैं । पाकिस्तानको बहावलपुरस्थित सुभान अल्लाह मस्जिदमा भारतले गरेको लक्षित सैन्य कारबाहीमा उग्रवादी संगठन जैस-ए-मोहम्मद (जेईएम) का कमाण्डर मसूद अजहरको परिवारका १० जना सदस्यसहित कुल १४ जना मारिएको समाचार बीबीसीले जनाएको छ । यो कारबाही मंगलबार राति भएको थियो । यसले पाकिस्तानमा आधारित आतंकवादी संगठनको संरचनामा ठूलो धक्का पुगेको अनुमान गरिएको छ ।
जैस-ए-मोहम्मदले बुधवार जारी गरेको आधिकारिक बयानमा मृतकहरूमा मसूद अजहरकी दिदी, भिनाजु, र तिनीहरूको परिवारका अन्य सदस्यहरू रहेको पुष्टि गरेको छ ।
मृतकहरूमा ५ वर्षको एक बालक पनि समावेश छन्, जसले यो हमलाको मानवीय क्षतिलाई थप जटिल बनाएको छ। संगठनका अनुसार, मसूद अजहरका तीन जना नजिकका सहयोगी पनि यस हमलामा मारिएका छन्। यद्यपि, मसूद अजहर स्वयं यो हमलामा जीवित रहेको र उनको अवस्था अज्ञात रहेको अनुमान गरिएको छ।
जैस-ए-मोहम्मद एक कट्टरपन्थी इस्लामिक उग्रवादी संगठन हो, जसको स्थापना मसूद अजहरले सन् २००० मा गरेको थिए। यो संगठनले भारत प्रशासित जम्मू-कश्मीरमा धेरै आतंकवादी हमलाहरू गरेको छ ।
विशेषगरी, सन् २०१९ फेब्रुअरी १४ मा जम्मू-कश्मीरको पुलवामामा भएको आत्मघाती बम आक्रमणमा ४० भारतीय अर्धसैनिक बलका जवानहरूको मृत्यु भएको थियो । यो हमलाको जिम्मेवारी जैस-ए-मोहम्मदले लिएको थियो । उक्त घटनापछि भारतले पाकिस्तानको बालाकोटमा हवाई हमला गरेर जेईएमको तालिम शिविर ध्वस्त पारेको दाबी गरेको थियो ।
