युद्धका बीच रुस र युक्रेनबीच वार्ताको तयारी भएको छ ।
रुसी विदेशमन्त्री सर्गेइ लाभरोभले युक्रेनले आत्मसमर्पण गरे रुस वार्ता गर्न तयार रहेको बताएको केही समयपछि युक्रेनी राष्ट्रपति भोलोदिमिर जेलिन्स्कीले रुसलाई वार्ताका लागि निम्तो दिएका थिए ।
युक्रेनी राष्ट्रपतिको वार्ताको निम्तो दिएपछि क्रेमिलन पनि वार्ता गर्न सहमत भएकाे छ । क्रेमिलन प्रवक्ता दिमित्री पेसकोभले तथस्ट भूमिमा वार्ता गर्न सकिने जनाएका छन् । उनले बेलारुसको राजधानी मिन्स्कमा वार्ता गर्न सकिने बताएको बीबीसीले रुसी समाचार एजेन्सी उदृत गरी जनाएकाे छ ।
रुस र युक्रेनबीचको सम्बन्धको हिसाबले मिन्स्क महत्त्वपूर्ण छ ।
पूर्वी युक्रेनमा रुस समर्थक विद्रोही र युक्रेनी सेनाबीचको रक्तपातपूर्ण द्वन्द्वपछि सन् २०१४ मा मिन्स्क–१ र २०१५ मा मिन्स्क–२ सम्झौतामा हस्ताक्षर भएको थियो ।
सन् २०१५ को फेब्रुअरीमा बेलारुसको राजधानी मिन्स्कमा रुस, युक्रेन, जर्मनी र फ्रान्सका नेताहरूको उपस्थितिमा यो सम्झौतामा हस्ताक्षर भएको थियो ।
यसअन्तर्गत रुस समर्थक पृथकतावादीहरूले कब्जामा लिएका क्षेत्रमा शान्ति स्थापनाका लागि कदम चाल्नुपर्ने थियो । अब रुसको आक्रमणलाई मिन्स्क सम्झौताको उल्लङ्घनका रूपमा हेरिएको छ ।
रुस युक्रेन नेटोमा सामेल नहोस् भन्ने चाहन्छ । युक्रेन संकटका सम्बन्धमा रुसले अमेरिका र अन्य पश्चिमी देशहरूसँग वार्ता गरिरहेको बेला पनि रुसको मुख्य माग युक्रेनलाई नेटोमा समावेश नगर्नु नै थियो ।
बिहीबारदेखि रुसले युक्रेनमाथि लगातार आक्रमण गरिरहेको छ । युक्रेनतर्फ ठूलो क्षति भएको बताइएको छ । रुसी सेना युक्रेनको राजधानी किभसम्म पुगिसकेका छन् ।
