काठमाडौं। भारत र पाकिस्तानबीचको तनाव चर्किदै गएको छ। भारतीय अधिकारीहरूले पाकिस्तानले भारत तथा भारत-प्रशासित कश्मीरमा रहेका सैन्य ठेगानामा मिसाइल र ड्रोन आक्रमण गरेको आरोप लगाएका छन्। तर पाकिस्तानले यी आरोपहरू अस्वीकार गर्दै भारतले झुटो प्रचार गरेको बताएको छ। सीएनएनले दुवै देशका भनाइ उद्धृत गर्दै यस्ता घटनाक्रमहरूबारे जानकारी दिएको छ।
विस्फोट र ब्ल्याकआउट
भारतका स्थानीय अधिकारीहरूका अनुसार पञ्जाब, कश्मीर र राजस्थानका विभिन्न स्थानमा विस्फोटपछि व्यापक ब्ल्याकआउट गरिएको छ। जम्मू सहरमा विस्फोटको आवाज सुनिएको र सुरक्षाका लागि बत्ती निभाइएको भारतीय सेनाले बताएको छ। स्थानीय बासिन्दा तथा पत्रकारहरूले ती क्षेत्रमा आतंक र तनावको वातावरण व्याप्त भएको बताएका छन्।
हवाई सुरक्षा सतर्कता
पठानकोटमा समेत विस्फोटको खबर आएको र त्यहाँ हवाई सुरक्षा प्रणाली सक्रिय गरिएको अधिकारीहरूले जनाएका छन्।
पाकिस्तानको दाबी
पाकिस्तानको सूचना मन्त्रालयले भारत-प्रशासित कश्मीरको वास्तविक नियन्त्रण रेखा (LOC) क्षेत्रमा भारतीय सेनाका ४०/५० जवान मारिएको दाबी गरेको छ। यद्यपि, सीएनएनले यो दाबी स्वतन्त्र रूपमा पुष्टि गर्न सकेको छैन।
पाकिस्तानी सेनाका प्रवक्ता मेजर जनरल अहमद शरीफ चौधरीले २९ वटा भारतीय ड्रोन नष्ट गरिएको र ती आक्रमणमा तीन जनाको मृत्यु र चार जना घाइते भएको दाबी गरेका छन्।
भारतको प्रतिक्रिया
अमेरिकामा भारतका राजदूत विनय क्वात्राले पाकिस्तानमा भारतले हालै गरेको कारबाहीलाई अन्तिम कारबाही मानेको र त्यसले आतंकवादी संरचनामाथि मात्र लक्षित गरेको दाबी गरेका छन्। उनले पाकिस्तानले पुन: तनाव चर्काएको आरोप पनि लगाएका छन्।
युद्धक विमान नष्ट?
एक अमेरिकी वरिष्ठ अधिकारीले भारतको हवाई कारबाहीका क्रममा पाकिस्तानले भारतको एक जेट विमान नष्ट गरेको बताएका छन्। पाकिस्तानले फ्रान्समा निर्मित तीन सहित पाँच वटा भारतीय युद्धक विमान नष्ट गरेको दाबी गरे पनि भारतले यसबारे आधिकारिक प्रतिक्रिया दिएको छैन।
