काठमाडाैं । बंगलादेशको गोपालगन्जमा नेशनल सिटिजन पार्टी (एनसिपी) को र्यालीका क्रममा बुधबार भीषण हिंसा भड्किएको छ। विद्यार्थी आन्दोलनको सफलताको एक वर्ष पुगेको उपलक्ष्यमा आयोजित कार्यक्रममा हिंसा भएपछि प्रहरीले गोली चलाएको थियो, जसमा कम्तीमा चार जनाको मृत्यु भएको छ भने १३ जना घाइते भएका छन्।
गोपालगन्ज, जुन प्रधानमन्त्री शेख हसिनाको गृहनगर हो, त्यहाँ एनसिपीले पूर्वघोषित कार्यक्रमअनुसार र्याली आयोजना गरेको थियो। तर शेख हसिनाकै दल अवामी लिगका झन्डै २ सय समर्थकहरू घरेलु हतियारसहित कार्यक्रमस्थल नजिकै पुगेर मञ्च र कुर्सीहरूमा तोडफोड गरेपछि स्थिति तनावग्रस्त बनेको थियो।
स्थिति नियन्त्रण गर्न प्रहरीले अश्रुग्यास प्रहार गरेको भए पनि दिउँसो करिब २:४५ बजे झडप सुरु भयो। जब अवामी समर्थकहरूले एनसिपी नेताहरूमाथि आक्रमण थाले, तब र्यालीमा सहभागीहरूले पनि प्रतिकार गरेका थिए। स्थिति अनियन्त्रित भएपछि प्रहरीले गोली चलाएको थियो।
गोली लागेर गोपालगन्जका दिप्तो साह, रमजन काजी, सोहेल र इमोनको मृत्यु भएको पुष्टि भएको छ। घाइतेमध्ये केहीको अवस्था गम्भीर रहेको बताइएको छ। गोपालगन्ज अस्पतालका सुपरिटेन्डेन्ट जिबितेश विश्वासका अनुसार दिप्तो र रमजनलाई साँझ साढे ६ बजे मृत अवस्थामा अस्पताल पुर्याइएको थियो।
एनसिपीका नेता नहिद इस्लामले उक्त आक्रमण आफूहरूलाई लक्षित गरेर गरिएको आरोप लगाएका छन्। ‘र्यालीपछि मदारीपुरतर्फ जाँदै गर्दा हामीमाथि योजनाबद्ध हमला भयो,’ उनले पत्रकार सम्मेलनमा बताएका थिए।
घटनापछि गोपालगन्जमा कर्फ्यु जारी गरिएको छ, जुन आज बेलुकी ६ बजेसम्म लागू हुने बताइएको छ।
