उत्तर कोरियासँग ११ गोल खाएसँगै एसिया कपको दौडबाट बाहिरियो नेपाल

काठमाडौँ । अन्तिम खेलमा उत्तर कोरियासँग ११-० गोलअन्तरले पराजित हुँदा नेपाल एएफसी यू-२० महिला एसियन कपमा छनोट हुन असफल भएको छ ।  भुटानमा जारी छनोटमा नेपाललाई ११-० को गोलअन्तरले हराउँदै उत्तर कोरिया एसिया कपमा छनोट भएको हो ।

समूह ‘ए’ बाट ९ अंक जोड्दै उत्तर कोरिया एसिया कपमा पुगेको हो । पहिलो हाफमा ५ गोल गरेको उत्तर कोरियाले दोस्रो हाफमा थप ६ गोल गर्‍यो । खेलको तेस्रो मिनेटमा नै उत्तर कोरियाले पहिलो गोल गरेको थियो ।

त्यसपछि १२औँ मिनेटमा दोस्रो, २४औँ मिनेटमा तेस्रो, ३७औँ मिनेटमा चौथो र ४१औँ मिनेटमा पाचौं गोल गर्‍यो । दोस्रो हाफमा ४८औँ, ५३औँ, ८८औँ, इन्जुरी समयको पहिलो, छैटौँ र अन्तिम मिनेटमा गोल गर्न सफल रह्यो । नेपालले पहिलो खेल भुटानसँग १–१ को बराबरी खेल्दा साउदी अरेबियालाई १-० ले पराजित गरेको थियो ।