आन्दोलनकारीले सिंहदरबारमा भीषण आगजनी हुँदा पनि, नेपालको एकताको प्रतीक पृथ्वीनारायण शाहको सालिक सतीसाल जस्तै अडिग भएर उभिएको देखिएको छ। आन्दोलनकारीहरुले शालिक जोगाएका छन् । धुवाँ र भग्नावशेषको बीचमा शालिक सुरक्षित देखिन्छ ।
Category: ब्रेकिंग न्युज
ब्रेकिंग न्युज
-
तीन दिनका लागि एनटीसीको भ्वाइस कल र इन्टरनेट सेवा निःशुल्क
काठमाडौं । दूरसञ्चार प्रदायक कम्पनी नेपाल टेलिकम (एनटीसी)ले तीन दिनका लागि भ्वाइस कल र इन्टरनेट सेवा निःशुल्क गरेको छ ।
हाल देशमा उत्पन्न विषम परिस्थितिलाई मध्यनजर गर्दै एनटीसीले डाटा तथा भ्वाइस सहितको प्याकेज निशुल्क गरेको हो । बुधबारदेखि प्रत्येक उपभोक्ताहरुलाई सन्देश मार्फत डाटा तथा भ्वाइस सहितको प्याकेज दिएको हो ।
डाटा लिन स्टार १४१५ स्टार ८ स्टार ३ ह्याज डायल गरी भ्वाइस कलको सेवा लिन सकिने एनटीसीले जानकारी दिएको छ । यस्तै एनटीसीका अनुसार डाटाको लागि स्टार १४१५ स्टार ८ स्टार ७ ह्याज डायल गरी सेवा लिन सकिन्छ ।
-
सेनाले भन्यो: नेपाल र नेपाली जनताको रक्षा गर्न प्रतिबद्ध छौँ
नेपाली सेनाले नेपाल र नेपाली जनताको रक्षा गर्न प्रतिबद्ध रहेको बताएको छ । आज एक विज्ञप्ति जारी गर्दै नेपाली सेनाले नेपालको स्वतन्त्रता, सार्वभौमसत्ता, भौगोलिक अखण्डता, स्वाधीनता, राष्ट्रिय एकताको रक्षा र नेपाली जनताको जिउधनको सुरक्षार्थ विषम परिस्थितिमा पनि नेपाली सेना प्रतिबद्ध रही आएको जनाएको हो ।सेनाले नेपालमा हाल भइरहेको जेनजी आन्दोलनका विकसित घटनाक्रमहरूबारे विश्लेषण गरिरहेको समेत जनाएको छ । सेनाद्वारा जारी विज्ञप्तिमा भनिएको छ, “यस आन्दोलनको क्रममा हुन पुगेको जनधनको अपूरणीय क्षतिप्रति गहिरो दुःख प्रकट गर्दै दिवङ्गत आत्माको चिरशान्तिको कामना गर्नुका साथै शोक सन्तप्त परिवारजन प्रति नेपाली सेना हार्दिक समवेदना र सहानुभूति व्यक्त गर्दछ । साथै, घाइते बिरामीहरूको शीघ्र स्वास्थ्य लाभको कामना समेत गर्दछ ।”सेनाले यस विषम परिस्थितिमा संयमित हुन सबैलाई अपिल अनुरोध समेत गरेको छ । “यस विषम परिस्थितिमा देशको ऐतिहासिक, सांस्कृतिक, पुरातात्त्विक र राष्ट्रिय सम्पत्तिको संरक्षण गर्नु हामी सबैको साझा दायित्व हो । तसर्थ, विद्यमान परिस्थितिलाई थप जटिल हुन नदिन सामाजिक सद्भाव तथा राष्ट्रिय एकतालाई कायम राख्दै संयमित हुन नेपाली सेना सम्पूर्ण युवा जनशक्ति र देशवासीमा हार्दिक अनुरोध गर्दछ,” विज्ञप्तिमा भनिएको छ ।
-
राष्ट्रपतिले वार्तामा बोलाए जेनजीलाई
राष्ट्रपति रामचन्द्र पौडेलले आन्दोलनरत जेनजी पुस्तालाई वार्तामा आउन अपिल गरेका छन् । मंगलबार एक अपिल जारी गर्दै राष्ट्रपति रामचन्द्र पौडेलले सबै पक्षलाई पक्षलाई संयमित हुन र वार्तामा आउन अपिल गरेका हुन्।पौडेलद्वारा जारी अपिलमा भनिएको छ, “लोकतन्त्रमा नागरिकले उठाएका मागहरू जेनजीका प्रतिनिधिसँग समेत बसेर वार्ता र संवादमार्फत समाधान गर्न सकिने भएकाले संयमित हुन, मुलुकलाई अरू क्षति हुन नदिन र वार्तामा आउन म सबै पक्षलाई अपिल गर्दछु ।”उनले प्रधानमन्त्री केपी शर्मा ओलीको राजीनामा स्वीकृत भइसकेको भन्दै शान्तिपूर्ण समाधानका लागि सबैलाई सहयोग गर्न आग्रह गरेका हुन्। -
राजकुमार गुप्ताको घरमा पनि आगजनी र तोडफोड
काठमाडौँ । युवा प्रदर्शनकारीले आज पूर्व सामान्य प्रशासन मन्त्री तथा एमाले सांसद राजकुमार गुप्ताको घरमा पनि आगजनी र तोडफोड गरेका छन् ।
वीरगन्जको रानिघाटस्थित उनको घरमा दिउसो करीब ३ बजे प्रदर्शनकारीहरूको समूहले आगजनी र तोडफोड गरेका हुन् ।
-
प्रदर्शनकारीहरूले संसद् भवनमा लगाए आगो
प्रदर्शनकारीहरूले नयाँ बानेश्वरस्थित संसद् भवनमा आगजनी गरेका छन् ।मंगलबार आक्रोशित प्रदर्शनकारीहरूले सङ्घीय संसद्मा प्रवेश गर्दै आगो लगाइदिएका हुन् ।आगजनीबाट भएको क्षतिको विवरण आइसकेको छैन । -
प्रधानमन्त्री ओलीले दिए पदबाट राजीनामा
प्रधानमन्त्री केपी शर्मा ओलीले पदबाट राजीनामा दिएका छन् ।प्रधानमन्त्री ओलीले राजनीतिक निकासका लागि भन्दै राजीनामा दिएको नेकपा एमालेका महासचिव शङ्कर पोखरेलले जानकारी दिए ।जेनजी आन्दोलन नियन्त्रणबाहिर गएपछि प्रधानमन्त्री ओली राजीनामा दिन बाध्य भएका हुन् ।सोमबारबाट सुरु प्रदर्शनका क्रममा हालसम्म १९ जनाको ज्यान गइसकेको छ भने ४ सय बढी घाइते भएका छन् । आज पनि देशभर आन्दोलन चर्किएको छ । -
देशभित्रबाटै समस्याको निकास निकाल्न पूर्वराजाको आग्रह
पूर्वराजा ज्ञानेन्द्र शाहले देशमा देखिएको पछिल्लो समस्याको समाधान देश भित्रैबाट खोज्न अनुरोध गरेका छन् । पूर्वराजा शाहको संवाद सचिवालयले आज एक विज्ञप्ति जारी गर्दै जेनजीले देश र समाजका निम्ति केही राम्रो काम गरौँ भन्ने उद्देश्य राखेकोमा उनीहरूको जायज माग सम्बोधन नगरी आन्दोलनमा मानवीय क्षति भएको भन्दै पूर्वराजा ज्ञानेन्द्रले दुःख व्यक्त गरेको जनाएको हो ।‘पछिल्लो पुस्ताको यो आन्दोलन हिंसात्मक नबनोस्, अराजक नरहोस् र यसमा कसैको घुसपैठ नहोस् भन्ने धारणा राखी बक्सेको छ । हाल उठेको सुशासन र आर्थिक अनुशासनका कुरा ध्यानमा राखी देश भित्रबाटै समस्याको समाधान निकालियोस् भन्ने चाहना राखी बक्सेको छ,’ पूर्वराजा ज्ञानेन्द्रको संवाद सचिवालय मंगलबार जारी गरेको विज्ञप्तिमा उल्लेख छ ।पूर्वराजा ज्ञानेन्द्र शाहले यो घटना शान्ति प्रिय नेपाली समाजको मान्यता विपरीत रहेको समेत बताएका छन् ।जेनजीले देश र समाजका निम्ति केही राम्रो काम गरौँ भन्ने उद्देश्य राखेर गरेको विरोध प्रदर्शन मार्फत पोखेको आक्रोश निश्चय पनि आम चासोको विषय भएको विज्ञप्तिमा उल्लेख छ ।पूर्वराजा ज्ञानेन्द्रले प्रदर्शनका क्रममा घाइते भएकाहरूको शीघ्र स्वास्थ्य लाभको कामना समेत गरेका छन् । -
त्रिभुवन विमानस्थलबाट बन्द, पुग्यो सेना
त्रिभुवन अन्तर्राष्ट्रिय विमानस्थल उडान बन्द भएको छ । नेपाल नागरिक उड्डयन प्राधिकरणका अनुसार विमानस्थलबाट हुने सबै आन्तरिक तथा अन्तर्राष्ट्रिय उडानहरू बन्द भएका हुन् ।विमानस्थलतर्फ भिड बढ्दै गएको र गोठाटार, एयरपोर्ट आसपास लगायतका क्षेत्रमा निरन्तर आगलागीका घटना भइरहेको र परिस्थिति प्रतिकुल बन्दै गएपछि विमानस्थल उडान बन्द भएको हो । असुरक्षा बढेपछि अहिले विमानस्थलमा नेपाली सेनाले सुरक्षा दिइरहेको छ । -
देशैभर प्रदर्शन, पार्टी कार्यालयहरू तथा नेताहरूका घरमा आगजनी
जेनजीले थालेको प्रदर्शन दोस्रो दिन थप चर्किएको छ । अहिले देशैभर प्रदर्शनहरू भइरहेका छन् ।प्रदर्शनहरूले नेकपा एमालेको च्यासलस्थित केन्द्रीय कार्यालय, नेपाली काँग्रेसको सानेपास्थित केन्द्रीय कार्यालयसँगै जिल्लाहरूमा रहेका पार्टी कार्यालयहरूमा तोडफोड तथा आगजनी गरेका छन् ।यस्तै, प्रदर्शनकारीहरूले राष्ट्रपति रामचन्द्र पौडेलको काठमाडौँको बोहोराटारस्थित बोहोराटारस्थित घरमा तोडफोड गरेका छन् ।प्रदर्शनकारीहरूले नेपाली काँग्रेसका सभापति शेरबहादुर देउवाको घरमा आगजनी गरेका छन् । मुख्य गेट तोडेर घरभित्र प्रवेश गरेका प्रदर्शनकारीले घरभित्रै आगो लगाइदिएका हुन् । यद्यपि, आगो लगाइँदा देउवा भने उनको निवासमा थिएनन् ।प्रदर्शनकारीहरूले प्रधानमन्त्री केपी शर्मा ओलीको भक्तपुरको बालकोटस्थित निजी निवासमा समेत आगजनी गरेका छन् । ओली निवासमा समेत आगजानी भएपछि प्रहरीले गोली चलाएको छ । जस क्रममा २ जना प्रदर्शनकारीहरू घाइते भएका छन् ।प्रदर्शनकारीहरूले देउवा पत्नी एवं परराष्ट्र मन्त्री आरजु राणा देउवाको धनगढीस्थित घरमा समेत आगजनी गरेका छन् । यसबाहेक, काठमाडौँको नैकापस्थित पूर्व गृहमन्त्री रमेश लेखकको घरमा समेत आगजनी गरिएको छ । काँग्रेस नेता बिमलेन्द्र निधी र एमाले नेता गोकुल बासकोटाको घरमा समेत आगजनी भएको छ । काँग्रेस नेता गगन थापाको घरमा ढुंगामुढा गरिएको छ ।